Non podo conectar o meu dispositivo Bluetooth
Hai varias razóns polas que non podería conectarse ao seu dispositivo Bluetooth, como un teléfono ou máns libres.
- Conexión bloqueada ou non confiábel
Algúns dispositivos Bluetooth bloquean as conexións de maneira predeterminada ou requiren que se lles cambie a configuración para permitir as conexións. Asegúrese de que o seu dispositivo permite as conexións.
- Hardware Bluetooth non recoñecido
É posíbel que o seu equipo non recoñeza o seu adaptador ou dongle Bluetooth. Isto pode deberse a que non teña instalados os controladores para o seu adaptador. Algúns adaptadores Bluetooth non funciona con Linux, e por tanto non lle será posíbel conseguir os controladores axeitados para eles. En tal caso, probabelmente terá que conseguir outro adaptador Bluetooth diferente.
- Adaptador non está acendido
Asegúrese de que o seu adaptador Bluetooth está acendido. Abra o panel de Bluetooth e comprobe que non está desactivado.
- Conexión do dispositivo Bluetooth apagado
Comprobe que o Bluetooth está acendido no dispositivo ao que está tentando conectarse, e que é descubrível e visíbel. Por exemplo, se está tentando conectarse a un teléfono, comprobe que non está en modo avión.
- Non hai ningún adaptador no seu computador
Moitos computadores non teñen adaptadores de Bluetooth. Pode comprar un adaptador se quere usar Bluetooth.